Polis iki avtomobildən 12 cəsəd aşkarladı

Meksikanın mərkəzində polis iki avtomobildən 12 nəfərin cəsədini aşkarlayıb. Avtosfer.az xəbər verir ki, hadisə San-Luis-Potosi ştatının Dulse-Qrande rayonunda qeydə alınıb. Bu barədə oktyabrın 5-də “Reuters” agentliyi məlumat yayıb.

Ştatın baş prokurorluğundan verilən məlumata görə, asayiş keşikçiləri 2-si qadın 10-u kişi olan meyitlərin yanından cinayətkar təşkilatdan yazılı məktub da tapıblar. Hadisənin qisas zəmində törədildiyi ehtimal olunur. Ancaq məktubda qisasın hansı səbəbdən alındığı qeyd edilmir.

Hazırda hüquq-mühafizə orqanları hadisənin kimlər tərəfindən və hansı səbəbdən törədildiyini araşdırır.

Agentlik həmçinin qeyd edib ki, bu ilin 8 ayı ərzində, bir neçə qruplaşmanın fəaliyyət göstərdiyi San-Luis-Potosi ştatında 411 insan öldürülüb, bu da 2019-cu ilin analoji göstəricisindən 43%  çoxdur.

Namiq Musayev