Polşadan vətəndaşlarımız üçün çarter reysləri həyata keçiriləcək - RƏSMİ

“Ukraynadakı vəziyyətlə əlaqədar yaxın günlərdə Polşa sərhədindən keçən Azərbaycan vətəndaşları üçün çarter reyslərinin həyata keçirilməsi planlaşdırılır”.

Avtosfer.az-ın məlumatına görə, bunu Xarici İşlər Nazirliyinin Mətbuat xidməti idarəsinin rəisi Leyla Abdullayeva keçirilən brifinqdə bildirib.

O, Polşa istiqamətində vətəndaşların sərhədi keçməsi ilə bağlı da danışıb:

“Söhbət çoxsaylı insanların sərhəd məntəqəsinə toplanmasından gedir. Kilometrlərlə növbə formalaşır və insanlar gözləməli olurlar. Vətəndaşlarımızdan xahiş edirik ki, sərhədi keçdikdən sonra səfirliklə əlaqə saxlayıb, qeydiyyata alınsınlar”.

O qeyd edib ki, təəssüf ki, baş verən hadisələr zamanı həyatını itirən soydaşlarımız da olub:

“Son məlumata görə, beş nəfər vətəndaşımız vəfat edib. Ukraynada olan vətəndaşlarımızdan xahiş edirik ki, hərbi qüvvələrin cəmləşdiyi yerlərdən uzaq olsunlar”.