Problemli kreditlərlə bağlı mexanizmlərdə nələr dəyişəcək? - AÇIQLAMA

Qaytarılmayan kreditlərlə bağlı yeni mexanizmin hazırlanması gündəmdədir.

Avtosfer.az xəbər verir ki, yeni qaydalara əsasən, müəyyən hallarda kredit risklərinin sığortalanması hesabına ödənilməyən borcların üçüncü tərəfin vəsaiti hesabına bağlanması nəzərdə tutulur. Bu mexanizmin hansı hallarda tətbiq ediləcəyi, vətəndaşlara hansı üstünlükləri və əlavə öhdəlikləri yaradacağı isə müzakirə olunan əsas məsələlərdəndir.

Mövzu ilə bağlı iqtisadçı Xalid Kərimli Avtosfer.az-a açıqlamasında bildirib ki, vətəndaşın işsiz qalması ilə bağlı sığorta mexanizmi tətbiq edilərsə, bu, bütün hallarda işini itirən hər kəsə şamil olunmayacaq:

"Burada əsas şərtlərdən biri iş yerinin vətəndaşın təqsiri olmadan bağlanması və ya əmək münasibətlərinə onun iradəsindən kənar xitam verilməsi kimi hallar ola bilər. Bununla belə, vətəndaş nəzərə almalıdır ki, bu növ sığorta əlavə ödəniş tələb edəcək. Necə ki, avtomobil sığortası zamanı sığorta haqqı ödənilir və sığorta hadisəsi baş verdikdə müqavilədə nəzərdə tutulan şərtlərə uyğun olaraq ödəniş edilir, işsizlik sığortasında da eyni prinsip tətbiq olunacaq. Sığorta əldə etmək risklərin tam aradan qalxması demək deyil. Sadəcə, müəyyən risklər müqavilə əsasında sığorta şirkətinin üzərinə keçirilir. Sığorta şirkəti isə bu riski qiymətləndirəcək, şəxsin işsiz qalma ehtimalını, çalışdığı sahəni və digər meyarları nəzərə alaraq sığorta haqqını müəyyən edəcək. Bu səbəbdən vətəndaş hər ay müəyyən məbləğdə sığorta haqqı ödəməli olacaq. Bu, icbari tibbi sığorta və ya könüllü sığorta mexanizmlərində olduğu kimi, əlavə maliyyə öhdəliyi yaradır".
İqtisadçı qeyd edib ki, bu məhsul sığorta şirkətləri üçün yeni satış imkanı, banklar üçün isə kredit risklərinin azaldılması baxımından üstünlük hesab oluna bilər:
"Vətəndaş üçün isə həm müsbət, həm də mənfi tərəfləri var. Müsbət cəhəti odur ki, təqsiri olmadan əsas iş yerini itirdiyi halda sığorta şirkətindən ödəniş ala bilər. Mənfi tərəfi isə bu təminatdan yararlanmaq üçün mütəmadi olaraq sığorta haqqı ödəməli olmasıdır. Ümumilikdə, belə bir mexanizmin tətbiqi düzgün tənzimləndiyi halda həm maliyyə bazarına, həm də vətəndaşların sosial müdafiəsinə müsbət təsir göstərə bilər".

Fatimə