«Protiv» gedib piyadanı öldürən avtobus sürücüsü tutuldu – FOTO

Bakıda «Dərnəgül yolu» kimi tanınan Ziya Bünyadov prospektində dəhşətli qəza törədən avtobus sürücüsü hüquq-mühafizə orqanları tərəfindən saxlanılıb. Avtosfer.az-ın məlumatına görə, hazırda hadisənin başvermə səbəbləri dəqiqləşdirilir. İlkin ehtimala görə, təxminən 50-60 yaşlı arasında olan kişi səkidə dayanıbmış. O, yolu keçərkən soldan gələn maşınlara diqqət edirmiş. Bu zaman yolu «protiv» gələn 82 nömrəli avtobusu görməyən piyada faciə ilə üzləşib. Avtobus onun ayağını vurub. Kişi zərbənin təsirindən avtobusun təkərinin altına düşüb. Onun meyidi uzun müddət avtobusun təkəri altından çıxarıla bilməyib. Avtobusun qanlı təkərləri isə asfalt üzərində iz qoyaraq görənləri dəhşətə gətirib. Məsələ ilə əlaqədar Bakı Sərnişinnəqliyyat Məhdud Məsuliyyəti Cəmiyyətinin sərnişindaşımaları monitorinqi, lisenziya və fərqlənmə nişanlarının cəlb etmə şöbəsi müdiri Elçin Nəsirov anspress-ə bildirib ki, hazırda hadisə ciddi şəkildə araşdırılır. Qurum rəsmisinin sözlərinə görə, qəza törədən 82 saylı avtobusun sahibkarı ciddi şəkildə cəzalandırılacaq. “Çox güman ki, avtobus xətti sahibkarın əlindən alınacaq. Əgər kimsə avtobus işlədə bilmirsə, getsin başqa işlə məşğul olsun. İnsanların həyatı bahasına pul qazanmaq olmaz! Bundan sonra qəza törədən avtobusun sürücüləri ilə yanaşı sahibkarlar da ciddi şəkildə cəzalandırılacaq. Sahibkarlara daha ağır cəzalar verilməlidir!”, - deyə Elçin Nəsirov bildirib.