Ruben Vardanyan Ermənistan hakimiyyəti üçün niyə həssas mövzudur? – Politoloq AÇIQLADI

Politoloq Elxan Şahinoğlu Ermənistan parlamentinin sədri Alen Simonyanın son açıqlamasına münasibət bildirib.

Avtosfer.az xəbər verir ki, Alen Simonyan bildirib ki, İrəvan Bakıda saxlanılan sonuncu erməni vətəndaş azad olunaraq ölkəsinə qayıdana qədər fəaliyyətini davam etdirəcək.

Elxan Şahinoğlu isə hesab edir ki, bu bəyanat daha çox daxili auditoriyaya hesablanıb və erməni ictimaiyyətinə mesaj xarakteri daşıyır. Onun sözlərinə görə, Ermənistan hakimiyyəti bu cür açıqlamalarla guya saxlanılan şəxslərin azad olunması istiqamətində fasiləsiz çalışdığı görüntüsünü yaratmağa çalışır.

Politoloq bildirib ki, xüsusilə Ruben Vardanyan məsələsi Ermənistan hakimiyyəti üçün həssas mövzudur. Şahinoğlunun fikrincə, Vardanyanın azadlığa buraxılması və Ermənistana qayıtması ölkədaxili siyasi balansı dəyişə və hakimiyyət üçün əlavə risklər yarada bilər.

Ruben Vardanyan maliyyə və siyasi imkanları olan fiqur kimi Ermənistanın daxili siyasi proseslərinə təsir göstərmək potensialına malikdir. Onun sözlərinə görə, belə bir ssenaridə Vardanyanın müxtəlif siyasi qüvvələrlə əməkdaşlıq etməsi və hakimiyyətə qarşı fəallaşması ehtimalı istisna edilmir.

Elxan Şahinoğlu hesab edir ki, qarşıdan gələn siyasi proseslər və mümkün parlament seçkiləri fonunda bu mövzu Ermənistan daxilində əlavə gərginlik yarada bilər. Politoloqun qənaətincə, Alen Simonyanın açıqlamaları rəsmi İrəvanın mövqeyini ifadə etsə də, proseslərin arxa planında daha mürəkkəb siyasi hesablamalar mövcuddur.

Qeyd edək ki, məsələ ilə bağlı rəsmi İrəvanın və digər tərəflərin mövqeyi müxtəlif platformalarda səsləndirilməkdə davam edir.

Eltac Zülfüqaroğlu