Toyu videoya çəkmək istədi, 2 maşının arasında qaldı

Ucarda toyu videolentə alan operator ağır xəsarət alıb. Hadisə bu gün saat 13:00 radələrində rayonun Azərbaycan küçəsində qeydə alınıb. Rayonun Qarabörk kənd sakini Arif Ağabala oğlu Babayev Ucarda keçirilən toy məclisini videolentə alarkən, “Qazel” markalı yük maşını ilə toyda iştirak edən “VAZ -2106” markalı minik maşının arasında sıxılı vəziyyətdə qalıb. Ağır bədən xəsarətləri alan A.Babayev təcili olaraq, Ucar Mərkəzi Rayon xəstəxanasının cərrahiyə şöbəsinə yerləşdirilib. Ucar rayon Polis Şöbəsindən APA-ya bildirilib ki, hadisənin dəqiq səbəbi aparılan araşdırmalardan sonra məlum olacaq.