Traktorların işi ilə bağlı monitorinq qrupu yaradıldı

Traktorların işi ilə bağlı monitorinq qrupu yaradılıb. Avtosfer.az-ın Kənd Təsərrüfatı Nazirliyinə istinadla verdiyi məlumata görə, Gəncə Avtomobil Zavodunda istehsal edilən və “Aqrolizinq” ASC tərəfindən kənd təsərrüfatı məhsulları istehsalçılarının və aqroservis filiallarının istifadəsinə verilən traktorların işinin səmərəli təşkili ilə əlaqədar respublikanın bütün bölgələrində monitorinqlərin keçirilməsi, traktorların istismarı müddətində baş vermiş nasazlıqların və onların yaranması səbəblərinin müəyyənləşdirilməsi məqsədilə Azərbaycan Respublikası Kənd Təsərrüfatı Nazirliyinin müvafiq əmri ilə monitorinq qrupu yaradılıb. Monitorinq qrupunun tərkibinə Kənd Təsərrüfatı Nazirliyinin, “Aqrolizinq”ASC-nin, Azərbaycan və Lənkəran Dövlət Maşın Sınaq stansiyalarının və Gəncə Avtomobil Zavodunun mütəxəssisləri daxil edilib. Monitorinq zamanı traktorların istifadə olunduğu müddət, mexanizatorların peşəkarlığı, göstərilən texniki servis xidmətinin səviyyəsi və ehtiyat hissələrinin təchizatı ilə bağlı vəziyyət araşdırılacaq.