Yanacaqla bağlı seminar keçirildi

Avtomobil yanacağı sahəsində standartların uyğunlaşdırılması və avtomobil yanacağının sınaq təcrübələri üzrə seminar keçirilib. Bu seminar Azərbaycan Respublikası və Moldova Respublikası arasında iqtisadi əməkdaşlıq üzrə Hökumətlərarası Komissiyanın Protokolunun 6-cı bəndinin icrası məqsədi ilə təşkil olunub. Standartlaşdırma Metrologiya və Patent üzrə Dövlət Komitəsinin (SMPDK) aparat rəhbəri Elçin Quliyev seminarı açıq elan edib. O bildirib ki, bu tədbirin əsas məqsədi avtomobil yanacağı üzrə standartların formalaşdırılması və iki ölkə arasında təcrübə mübadiləsi aparılmasıdır. Daha sonra çıxış edən SMPDK-nin Təcrübə Sınaq Mərkəzinin direktoru Mahmud Quliyev avtomobil yanacağı sınaq təcrübəsindən danışıb. 

Avtomobil yanacağının labarotoriya təhlillərinin standartları və texniki təchizatı barədə danışan AzTEST-in Neft məhsullarının sınaq laboratoriyasının əməkdaşı yanacaqların keyfiyyətinin yoxlanıldığını söyləyib: “Turşuluq, buxarlılıq, doymuşluq, benzinin rəngi kimi məsələlər nəzərdən keçirilir. Benzinin oktan ədədi də yoxlama zamanı ölçülür. Əgər bu oktan ədədi normadan aşağı olarsa o zaman partlayış ola bilər”. Tədbir daha sonra iki ölkə arasında qarşılıqlı müzakirələrlə davam edib.

Fərid