Yol polislərini öldürən silahlılar ələ keçdi - RƏSMİ

Qroznıda Mətbuat Evinin binasında gizlənən silahlı şəxslər zərərsizləşdirilib. APA-nın “RİA Novosti”yə istinadən verdiyi xəbərə görə, bu barədə Rusiya Milli Antiterror Komitəsinin yaydığı məlumatda bildirilir. Məlumata qeyd olunur ki, keçirilən xüsusi əməliyyat çərçivəsində 20 nömrəli şəhər məktəbində gizlənmiş silahlıların zərərsizləşdirilməsi istiqamətində əlavə tədbirlər görülür.

Xatırladaq ki, gecə saatlarında Qroznıda 5 yol polisi əməkdaşı silahlı şəxslər tərəfindən öldürülüb. Polislər şübhəli avtomobili saxlamağa cəhd edərkən avtomobildə olan şəxslər atəş açıblar. Sonra silahlılar Mətbuat Evinin binasında gizləniblər.

***

Qroznıda keçirilən xüsusi əməliyyat zamanı həlak olan polis əməkdaşlarının sayı 10 nəfərə çatıb. Bu barədə “İnterfaks” agentliyinə Şimali Qafqaz Federal Dairəsinin güc strukturlarındakı mənbə məlumat verib.  Həmçinin əməliyyat zamanı 20-dək polis əməkdaşının, o cümlədən Çeçenistan xüsusi təyinatlıların komandirinin yaralandığı bildirilir.