Yol qəza qurbanlarının anım günü keçirildi - FOTO

Gündəm 21 Noyabr 2014 23:57 Oxunub 1514
Yol qəza qurbanlarının anım günü keçirildi - FOTO
WhatsApp kanalımıza abunə ola bilərsiniz
Fazil Mustafa: «Bilksiz sürücüyə vəsiqə vermək biliyi olmayan həkimə diplom vermək kimi ağır cinayətdiri»

Bu gün Bakı şəhəri 46 saylı Məktəbdənkənar Tərbiyə işi Mərkəzində Bakı şəhər Dövlət Yol Polisi İdarəsinin, «Jurnalistika və İnkişaf Mərkəzi» İctimai Birliyinin və Qızıl Aypara Cəmiyyətinin təşkilatçılığı ilə Ümumdünya Yol Qəza Qurbanlarının Anım Günü qeyd olunub. BMT-nin təsis etdiyi bu gün hər il noyabr ayının sonuncu iş həftəsinə təsadüf edir. «Yaşasaydım 25 yaşım olardı» devizi altında keçirilən tədbirdə millət vəkili Fazil Mustafa, müxtəlif təşkilatların nümayəndələri, valideynlər, uşaqlar və Bakı şəhər Dövlət Yol Polisi İdarəsinin əməkdaşları iştirak edib.

Tədbirdə çıxış edən 46 saylı Məktəbdənkənar Tərbiyə işi Mərkəzinin müəllimi Fəridə Süleymanova bildirib ki, yol qəzaları qurbanlarının xatirəsini yad etmək hər birimizin borcudur. Çünki həmin qəzalarda həlak olanların əksəriyyəti günahsız insanlardır. Eyni zamanda, onların arasında azyaşlı uşaqlar da var. Valideynləri, xüsusilə də sürücüləri yol hərəkəti qaydalarına ciddi riayət etməyə səsləyən F.Süleymanova sürət həddini aşanları, təhlükəsizlik kəmərindən istifadə etməyənləri qınayıb. Onun fikrincə, yol hərəkəti təhlükəsizliyi hər bir vətəndaşın davranışından asılıdır. Ona görə də, hər kəs qaydalara əməl etməlidir: «Əgər qaydalara əməl olunsa, inanıram ki, gələn il yol qəzalarında həlak olanların sayı indikədən 50 faiz az olar».

Tədbirdə çıxış edən millət vəkili Fazil Mustafa isə belə bir toplantının keçirilməsini ağrılı problemin gündəmə gətirilməsi kimi qiymətləndirib. Onun sözlərinə görə, yol qəzalarının sayının azaldılması ilk növbədə qaydalara riayət edən sürücülərin çoxalmasından asılıdır: «Bu gün biliksiz insana sürücülük vəsiqəsi vermək ağır cinayətdir. Biliksiz adama vəsiqə vermək savadsız həkimə diplom vermək kimi ağır əməldir. İndi təzə dəb yaranıb. İnsanlar bir-birinə sürücülük vəsiqəsi hədiyyə edirlər, bəzən xanımlara sürücülük vəsiqəsini hədiyyə verirlər. Düzdür, xanımlar kişilərə nisbətən daha diqqətli, intizamlı sürürlər. Amma yaxşı olardı ki, sürücülük vəsiqəsinin əvəzinə xanımlara daha dəyərli hədiyyə versinlər. Biliksiz adam sürücülük vəsiqəsi alırsa, bunun ağır nəticələrini biz hər gün yollarımızda görməli oluruq».

Məktəblərdə yol hərəkəti qaydalarının təbliğinin vacib olduğunu deyən millət vəkili əlavə edib ki, bununla bağlı parlamentdə də məsələ qaldıracaq: «Təbliğat, maarifləndirmə işi çox vacibdir. Bu yolla biz insanların yollarda həlak olmasının qarşısını ala bilərik. Bunun üçün hər kəs öz üzərinə düşən vəzifəni yerinə yetirməlidir».

Tədbirdə çıxış edən Bakı şəhər Dövlət Yol Polisi İdarəsinin bölmə rəisi Vaqif Əsədov isə bildirib ki, bu ilin əvvəlindən noyabrın 10-dək paytaxt ərazisində uşaqların iştirakı ilə baş vermiş 63 yol qəzasında 19 azyaşlı ölüb, 51 nəfər yaralanıb. Ölüm faktlarının sayı ötən ilə nisbətən 1 nəfər artıb. V.Əsədov deyib ki, azyaşlıların iştirakı ilə baş verən qəzaların əsas səbəbinin 49 faizini sürət həddinin aşılması, 51 faizinin təyin olunmayan yerlərdən keçən piyadaların avtomobillərlə vurulması təşkil edir.

Qəzaların baş verməsinin qarşısının alınması üçün görülən tədbirlərdən danışan V.Əsədov bildirib ki, ilk növbədə təbliğat işlərinə üstünlük verilir: “Yaxşı olar ki, evdə valideynlər, məktəbdə müəllimlər, küçədə isə böyüklər bizə kömək etsinlər. Unutmaq olmaz ki, yol-nəqliyyat hadisələri ilə əlaqədar azyaşlıların həyat və sağlamlığımın qorunmasında cəmiyyətimizin heç bir üzvü kənarda qala bilməz. “Uşaqlar bizim gələcəyimizdir” düşüncəsi ilə yanaşmalı və uşaqları yol-qəza hadisələrindən birlikdə qorumalıyıq”.

Tədbirin sonunda yol qəza qurbanlarının xatirəsinə azyaşlı uşaqlar tərəfindən havaya şarlar buraxılıb.

 

Elməddin

FOTO QALEREYA
ŞƏRH YAZ
Ad

E-mail

Şərh