Zəncirlənən keçidlərlə bağlı araşdırma başlandı

Nəqliyyat Nazirliyi yollarda bir neçə özbaşınalığın qarşısını alıb. “Azəryolservis” ASC-nin əməkdaşları fəaliyyətə keçib. Nəsimi rayonunda, 42 nömrəli məktəbin qarşısındakı piyada keçidinin önünə bağlanan zənciri qırmaq üçün əraziyə ağır texnika cəlb edilib. İlk olaraq qıfıllanan zəncir qoparılıb, sonra isə zəncirin bağlanması üçün yerə bərkidilən dəmir boru çıxarılıb.

Daha bir söküntü isə Mirqasımov küçəsində Nəsimi bazarı yaxınlığında kafe kimi istifadə olunan ərazidə oldu. Sahibkar yolun təxminən bir zolağına piltələr döşəyərək kafenin qarşısını ticarət məqsədi ilə istifadə edirmiş. Həmçinin ətrafa da tikinti materiallarını yığması yoldan keçənlərin işini daha da çətinləşdirir. Obyekt sahibi Məcid Yusifov bu işdə özünə haqq qazandırsa da, maneə aradan qaldırılıb və bu şəxs qanun pozuntusuna görə cərimə olunacaq.

“Azəryolservis” ASC-nin mətbuat xidmətinin rəhbərliyindən bildirilib ki, qanunu pozan fiziki şəxslər 100, hüquqi şəxslər 400-500, vəzifəli şəxslər 4-5 min manat cərimə olunacaq. “İstənilən ərazdə yolun hərəkət hissəsində hər hansı maneə yaradan şəxs cəzalandırılacaq. Odur ki, sonrada peşmançılıq yaşamayasız deyə, işinizi ehtiyatlı tutun”. ANS