Abşeronda qadın avtobusun qapısından yerə yıxıldı

Abşeron Rayon Məhkəməsində avtobusla yol qəzası törətməkdə təqsirləndirilən Səməndər Əsgərovun (şərti) cinayət işi üzrə məhkəmə istintaqı yekunlaşıb.
Avtosfer.az-ın əldə etdiyi məlumata görə, hakim  Vaqif Həsənovun sədrliyi ilə keçirilən prosesdə hökm oxunub.

Məhkəmənin hökmü ilə Cinayət Məcəlləsinin (CM) 263-1.2-ci maddəsi ilə elan olunmuş ittiham CM-in 263.1-ci maddəsinə tövsif olunub və cinayət işi üzrə icraata xitam verilib, cinayət məsuliyyətindən və cəzadan azad edilib. Təqsirləndirilən şəxs barəsində seçilmiş başqa yerə getməmək haqqında iltizam qətimkan tədbiri xitam olunub.

İttihama görə, hadisə 09 sentyabr 2022-ci il tarixdə, saat 12 radələrində Abşeron rayonu Xırdalan şəhəri ərazisində qeydə alınıb.

Belə ki, həmin dövrdə Səməndər Əsgərov “İsuzi” markalı 535 saylı marşrut avtobusunu idarə edib. O, nəqliyyat vasitəsindəki sərnişin, zərərçəkmiş Səbinə Ələkbərzadə (şərti) avtobusdan düşən zaman avtobusu hərəkətə gətirib. Bu zaman qadın avtobusdan yerə yıxılıb və nəticədə qapalı kəllə-beyin travması alıb. 

Hadisədən sonra Səməndər Əsgərov cinayət məsuliyyətinə cəlb edilib və barəsində başqa yerə getməmək haqqında qətimkan tədbiri seçilib.

Pravda.az