Avtomobildə unudulan 5 yaşlı uşaq öldü

ABŞ-ın Texas ştatında 37 dərəcəni keçən temperaturda saatlarla avtomobildə unudulan 5 yaşlı uşaq dünyasını dəyişib.

Avtosfer.az xəbər verir ki, Harris dairəsinin şerifi Ed Qonzalesin verdiyi açıqlamaya görə, Texas ştatının Hyuston şəhərində 5 yaşlı uşağın anası və 8 yaşlı bacısı ilə bacısına ad günü hədiyyələri almaq üçün alış-verişə gediblər. 

Qonzales bildirib ki, ana evə qayıdanda hər iki uşağın özbaşına maşından düşdüyünü və əyləncəyə hazırlaşmaq üçün evə daxil olduqlarını düşünüb. 

2-3 saatdan sonra uşağın evdə olmadığını anlayan ana onu axtarmağa başlayıb. Maşına tərəf gedən ana oğlunu təhlükəsizlik kəməri taxmış və hərəkətsiz vəziyyətdə tapıb.

Dairənin polis rəisi ananın təcili yardıma zəng etdiyini və uşağın hadisə yerində öldüyünü bildirib.

Səlahiyyətlilər hadisə ilə bağlı araşdırmalara başlanıldığını bildiriblər.

Qeyd edək ki, ölkədə hər il orta hesabla 15 yaşına çatmamış 38 uşaq nəqliyyat vasitəsində havanın isti olması səbəbindən dünyasını dəyişir.

"Unikal"