Bakıda atasının telefonunu oğurlayıb satan gənc həbs olunub

Bakıda atasının telefonunu oğurlayıb satan 23 yaşlı gənc həbs olunub. Avtosfer.az "Teleqraf"a istinadən xəbər verir ki, Nizami rayonu ərazisində atasına məxsus mobil telefonu oğurlayan 23 yaşlı gənc inzibati qaydada bir ay müddətinə həbs edilib. Məlumata görə, Sərdar Cəlalov (ad-soyad şərtidir) atasının “Samsung A23” markalı telefonunu 60 manata satıb. Ata məhkəmədə oğlundan şikayətçi olaraq bildirib ki, iki il əvvəl aldığı telefonu oğurlayıb satan oğlunu bağışlamır. 

Zərərçəkmiş ata ifadəsində deyib:

"Oğlum avara-avara gəzir, işləmir. Özüm isə tikintidə fəhlə işləyirəm. Yoldaşım 1 il 3 aydır rəhmətə gedib, heç kimim yoxdur. Üstəlik, maaş kartımdan 311 manat da götürüb”.

Qeyd edək ki, 23 yaşlı gəncin daha bir epizod üzrə Qəbələ sakininə məxsus 10 kiloqram fındığı oğurladığı da müəyyən edilib. Zərərçəkmiş şəxs hava şəraiti ilə əlaqədar məhkəmə iclasında iştirak edə bilməyib.