Küləkli havada zibil qabları "hərəkət edir" – Yol bağlayır - FOTO

Bu gün paytaxtda küləkli hava şəraiti müşahidə edilir. Bəzi şəxslərin işinə məsuliyyətsiz yanaşması nəticəsində külək fəsadlara səbəb olur. Belə ki, məişət tullantıları üçün təkərli qablar qoyulduğu yerə möhkəmlənmədiyi üçün küləklin təsiri ilə hərəkət etməyə başlayır. Bu da piyadalar və nəqliyyat vasitələri üçün təhlükə mənbəyidir. Zibil qabları küləyin təsiri ilə piyadalara və avtomobillərə çırpılır. Bu zaman onlar həm piyadaların sağlamlığına ziyan vura, həm də avtomobillərin önünə anidən çıxıb, qəza vəziyyəti yarada bilər.

Avtosfer.az xəbər verir ki, analoji hal Şərifzadə küçəsində də qeydə alınıb.

 Zibil qabları yerinə möhkəmlənmədiyi üçün hərəkət edərək avtomobil yoluna çıxıb. Sosial şəbəkələrdə yayılan fotoda aydın əks olunub ki, bir neçə qutu yolun hərəkət hissəsini tamamilə zəbt edib.

Təəssüf ki, belə halların dəfələrlə baş verdiyini müşahidə etsək də bu barədə ciddi tədbir görülmür. Görünür zibil qutuları “azadlığı”, işçilər isə məsuliyyətsizliyi sevir.

Məhəbbət Tərlanoğlu