Maşınların arasından qaçan qadın qəzadan son anda qurtuldu - VİDEO

Paytaxtın Nizami rayonu, Mikayıl Əliyev küçəsində yol hərəkəti qaydalarını pozan piyada kameraya düşüb.

Avtosfer.az-ın məlumatına görə, hadisə iyulun 31-də saat 17:03 radələrində qeydə alınıb.

Görüntülərdən məlum olur ki, orta yaşlı qadın yolda yaranmış nəqliyyat sıxlığından istifadə edərək avtomobillərin arasından qaçmaqla yolu keçməyə cəhd edib. Bu zaman o, ən sağ hərəkət zolağı ilə hərəkət edən avtomobillə toqquşmaq təhlükəsi ilə üz-üzə qalıb və son anda qəzadan yayınıb.

Kadrlarda piyadanın yolu piyada keçidi olmayan hissədən keçdiyi, eyni zamanda hərəkətdə olan nəqliyyat vasitəsinə kifayət qədər diqqət yetirmədiyi aydın görünür. Belə davranış həm piyadanın öz həyatı, həm də digər hərəkət iştirakçıları üçün ciddi təhlükə yaradır.

Qeyd edək ki, qanunvericiliyə əsasən, piyadalar yolu yalnız piyada keçidlərindən, onlar olmadıqda isə müəyyən edilmiş qaydalara riayət etməklə keçməlidirlər. Nəqliyyat axınının arasından qəfil hərəkət etmək və sürücünün piyadanı vaxtında görməsinə mane olan hallarda yola çıxmaq yol-nəqliyyat hadisəsinin baş verməsi riskini əhəmiyyətli dərəcədə artırır. Bu cür qayda pozuntuları faciəvi nəticələrlə yekunlaşa biləcəyindən, piyadaların hərəkət zamanı daha məsuliyyətli davranmaları vacibdir.

Nərmin