Paytaxtda özünü yol polisi kimi təqdim edən şəxs taksi sürücüsünü belə aldatdı

Paytaxtda özünü polis kimi təqdim edən şəxs taksi sürücüsünü aldadıb. Avtosfer.az xəbər verir ki, hadisə yanvarın 17-də saat 16:00 radələrində qeydə alınıb.  Belə ki, “Bolt” şirkətində taksi sürücüsü kimi fəaliyyət göstərən Həsənov Səid iddia edir ki, Neptun marketdən Ekologiya postuna gedişli sifariş qəbul edib marketə yollanıb. O bildirib ki, ünvana çatdıqda müştəriyə zəng edib: “Müştəri mənə “Qardaş bağışla. Mənim “Bolt” şirkətindən başım çıxmır. Deyəsən sifarişi səhv vermişəm. Sənəd işləri çoxdu deyə buradan çıxa bilmirəm. Özüm Baş Dövlət Yol Polisi İdarəsinin (BDYPİ) Ekoloji Nəzarət Bölüyündə polis kapitanı işləyirəm”.

Sürücü qeyd edir ki, müştəri ondan bir neçə məhsulu marketdən almağı xahiş edib: “Marketdən tapşırılan məhsulları aldım. Özünü polis kapitanı kimi təqdim edən şəxs “WhatsApp”dan mənə zəng edərək bildirdi ki, “Burada internet zəifdi, deyəsən pul yükləmək yaddan çıxıb”. Bu barədə məndən internet üçün ödəniş etməyimi xahiş etdi. Ayrı-ayrı 37 və 20 manat (cəmi 57 manat) məbləğində ödəniş etdim”.

İddiaya görə, bundan sonra müştəri sürücünün nömrəsini bloklayıb və o, dərhal polisə şikayət edib.

Məsələ ilə bağlı Avtosfer.az-a açıqlama verən Daxili İşlər Nazirliyinin (DİN) Mətbuat xidmətinin əməkdaşı Nurlan Əliyev bildirib ki, qeyd edilən məsələ ilə bağlı hazırda polis orqanında təhqiqat araşdırması aparılır.

“Araşdırmanın nəticəsində asılı olaraq əmələ hüquqi qiymət veriləcək. Vətəndaşlardan daxil olan və polis əməkdaşları tərəfindən aşkar olunan dələduzluq halları diqqətdə saxlanılmaqla araşdırılır. Vətəndaşları, xüsusən də taksi xidməti ilə məşğul olan şəxsləri ayıq-sayıq olmağa çağırır, tanımadıqları şəxslərə etibar etməmələrini tövsiyə edirik”.

Məhəbbət Tərlanoğlu