Qəbələdə güclü külək ağacı yola aşırdı,avtomobillərin hərəkətinə maneə yarandı - FOTO

Respublika əhəmiyyətli Qaraməryəm-İsmayıllı-Şəki avtomobil yolunun təqribən 65-ci km-lik hissəsində yolun hərəkət hissəsinə aşan irigövdəli ağac kənarlaşdırılıb.

Avtosfer.az xəbər verir ki, yaranan problemin aradan qaldırılması üçün dərhal Azərbaycan Avtomobil Yolları Dövlət Agentliyinin əməkdaşları əraziyə cəlb olunub, aidiyyəti qurumun əməkdaşları ilə birlikdə qısa müddət ərzində ağac doğranaraq daşınıb, ərazi təmizlənib, yolboyu hərəkətin təhlükəsizliyi və fasiləsizliyi təmin olunub.

***

Qəbələ rayonunda güclü külək ağacı yola aşırıb, avtomobillərin hərəkətinə maneə yaranıb

Bu barədə Avtosfer.az-a Fövqəladə Hallar Nazirliyindən (FHN) məlumat verilib.

Bildirilib ki, FHN-in "112" qaynar telefon xəttinə Qəbələ şəhərində iri gövdəli ağacın avtomobil yoluna aşması ilə əlaqədar yaranan təhlükə barədə məlumat daxil olub.

Məlumatla əlaqədar FHN-nin Şimal-qərb Regional Mərkəzinin xilasediciləri çağırış üzrə cəlb olunublar.

Əməliyyat şəraiti qiymətləndirilərkən müəyyən olunub ki, ağac küləyin təsirindən Qaraməryəm-İsmayıllı-Şəki avtomobil yolunun Qəbələ şəhəri ərazisindən keçən hissəsinə aşmaqla avtomobillərin hərəkətinə maneə yaradıb.

Xilasedicilər aşmış ağacı hissələrə kəsib yoldan kənarlaşdıraraq avtomobillərin təhlükəsiz hərəkətini təmin ediblər.