Avtobusun üstündə velosiped sürdülər – VİDEO

Çilidə təşkil olunan ənənəvi dağ velosipedi yarışı yenə həyəcanlı anlarla yadda qalıb. Dünyanın dörd bir yanından Valparaiso şəhərinə toplaşan ən təcrübəli velosipedçilər bir-birindən çətin maneələrlə dolu yürüşdə zamana qarşı mübarizə aparıb. Avtosfer.az atv.az-a istinadən xəbər verir ki, dünya çempionatında qalib gəlmək  üçün 1.7 kilometrlik məsafəni hamıdan əvvəl qət etmək lazımdır. Məsafə az olsa da, yola düzülən maneələr  yarışı kifayət qədər qəlizləşdirir. Təsadüfi deyil ki, idmançılar gah avtobusun üzərində, gah da pilləkənlərlə velosiped sürməli olub. Nəfəskəsən yarışı Slovakiyadan olan Filip Polk öndə tamamlayıb.  Bu idmançı 1.7 km-lik məsafəni  2 dəqiqə 28 saniyəyə qət edib. Olduqca çətin  yarışda Kolumbiyalı Marselo Qutierres  slovakiyalı çempiondan cəmi 1 saniyə geri qalıb. Çexiyalı Tomas Slavik isə 2 dəqiqə 31 saniyəlik göstərici ilə 3-cü yeri tutub. Qeyd edək ki,  hündürlükdən aşağı düşmək şərti ilə, dar küçələrdə keçirilən yarış öz kəskin döngələri ilə də diqqət çəkir. İdmançıların xəsarət alma ehtimalının yüksək olduğu çempionatda iştirak etmək üçün yüksək peşəkarlıq tələb olunur. Bu səbəbdən yarışa təcrübəsiz idmançılar buraxılmır.