Dünyanın ən güclü silahlarından biri nümayiş olundu - FOTO

Koreya Xalq Demokratik Respublikasının (KXDR) paytaxtı Pxenyanda Koreya Əmək Partiyasının səkkizinci qurultayı şərəfinə təntənəli hərbi parad keçirilib.

Bu barədə Koreya Mərkəzi Teleqraf Agentliyi bildirib.

Paradda xüsusi halda sualtı strateji ballistik raketlər təqdim edilib.

"Sualtı strateji ballistik raketlər dünyada ən güclü silahdır", - Koreya Mərkəzi Teleqraf Agentliyinin parad meydanında KXDR-in "inqilabçı silahlı qüvvələrinin gücünü göstərən" bəyanatında qeyd edilir.

Agentlik bildirib ki, parad Koreya Xalq Demokratik Respublikasının lideri Kim Çen Inın iştirakı ilə Pxenyanın mərkəzində Kim İr Sen meydanında keçirilib. Məlumata görə, tədbirdə həmçinin taktiki raketlərin və özüyeriyən artilleriya qurğularının ən yeni nümunələri nümayiş etdirilib.

Koreya Əmək Partiyasının səkkizinci qurultayı yanvarın 5-dən 12-dək keçirilib. (Report)