Kişilərin "ikinci arvadı" avtomobil – Qadın, yoxsa maşının xərci çoxdur?

Azərbaycan ən çox avtomobil idxal edilən, alınıb-satılan ölkələrdən biridir. Bu ölkədə ən populyar sayt da avtomobil saytıdır. Maşını olan kişi əvvəllər imkanlı hesab edilirdisə, indi “çörək ağacı var” deyə qəbul edilir. “Maşın ikinci arvaddır” deyimini isə yəqin ki, ərindən xəsislik görən qadınlarımız icad edib. Ya da həqiqətən evləndikdən sonra arvadın yox, maşının çox pul tələb etdiyini görən kişilər.

Gent.az ailə büdcəsinin qənimi, bəzən arvadı ərindən ayıran maşının kişinin həyatında yarada biləcəyi problemləri və xərci barədə kiçik araşdırma aparıb.

Arvadların gözünün düşməni 

• “Elə ki, kişidən nəyəsə artıq pul istəyirəm, 7 dəsmal çıxarıb ağlayır. 2 ildir nimdaş paltoda, ayaqqabıdayam, vecinə də deyil. Ancaq yemək, kommunal, uşaqlar, bir də maşın. Maşın ustası deyən kimi 200-300 manat lazımdır, hardan olsa tapıb aparır”.
• “Bəzən hirsimdən istəyirəm ki, maşını çəkiclə əzim. Çünki onun ucbatından büdcəmiz artmır. Deyirəm, sataq. Deyir bu köhnədir, xərci çoxdur, satıb başqasını alaram. Bu yerdə ərimi də boğmaq istəyirəm”.
• “Mənə deyirlər ki, ərinin maşını var, bəxtəvərsən. Amma hansı günümə sevinirlər bilmirəm. Uşaqları özüm dərsə aparıram, bazar-dükana da özüm gedirəm, həkimimə də. Maşın ancaq kişinin xidmətindəndir. İşə gedir, gəlir. Ürəyi hara istəyir özü gedir, lazım olanda tapılmır. Uzaq yola benzin çox gedir. Ancaq anasıgilə aparmağa maşın lazım olur”.