Məhşur boksçu «Cadillac»la darvazaya girdi

Boks üzrə keçmiş dünya çempionu Mayk Tayson daha bir insidentin səbəbkarı olub. Lent.az-ın “KNTV” telekanalına istinadən məlumatına görə, amerikalı boksçu özünün “Cadillac Escalade” markalı avtomobilini ABŞ-ın Las-Veqas şəhərindəki malikanələrdən birinin darvazasına çırpıb. Tayson qonaqlar üçün açıq qapı əvəzinə bağlı darvazadan içəri keçməyə cəhd edib. Bu zaman qapılar onun nəhəng avtomobili qarşısında tab gətirməyib. Hadisə yerinə gələn polislər boksçuya cərimə qəbzi təqdim ediblər. Bundan sonra 42 yaşlı idmançı qonaqlar üçün qapıdan içəri keçib. 

Qeyd edək ki, Tayson peşəkar rinqdə sonuncu döyüşünü 11 iyun 2005-ci ildə keçirib. Tayson o zaman irlandiyalı Kevin Makbrayda texniki nokautla uduzub. Adı daha çox qalmaqallarda hallanan boksçunun rinqə qayıdaraq vaxtilə qulağını dişlədiyi Evander Holifildlə döyüşmək istədiyi haqda xəbərlər yayılsa da, bu məlumathələ hələ təsdiqini tapmayıb.