Məmurların danışığını vətəndaşların anlayacağı dilə çevirən proqram hazırlandı

Almaniyada "məmurun almancası" adlı proqram istifadəyə verilib. Proqram təminatı mürəkkəb ifadə və cümlələrlə bəzədilmiş mətnləri sıravi vətəndaşların başa düşəcəyi formaya çevirir.

Bu əsasən, məmurların çıxışları və müxtəlif qanunvericilik aktlarının izahı üçün nəzərdə tutulub. Hohenheim Universitetinin alimləri ilə Ulm şəhərindəki bir şirkətin əməkdaşlığı çərçivəsində hazırlanan proqram öncə Baden-Württemberg əyalətindəki rəsmi qurumlarda çalışanlara paylanacaq.

Proqram, həmçinin mətnləri anlaşıqlılıq dərəcəsinə görə, çətindən asana doğru 0-20 şkalası ilə qruplaşdırır. Araşdırmalara görə, siyasi elmlər sahəsində yazılan doktorluq dissertasiyası 4.3, qəzetlərdəki siyasi xəbərlər 11-14, radio xəbərləri isə 16.4 çətinlik səviyyəsindədir.

Dövlət idarələri və məktəblərdə tətbiq ediləcək proqramın maliyyə dəyəri isə təxminən 150 min avrodur.