Navaxo hindularından kosmosa İSMARIC

1960-cı illərin əvvəlində NASA Aya kosmonavt göndərmək üçün hazırlıqlara başlayıb. Avtosfer.az "ölkə.az"-a istinadən bildirir ki, bu vaxt məşqlər Arizona səhrasında aparılıb. Ərazi navaxo hindularının yaşadığı yerə yaxın olub. Bir dəfə yaşlı bir hindu oğlu ilə qoyun otarırmış və məşq edən komanda ilə rastlaşıb. Qoca ancaq öz dilində bilirdi və ingilis dilini bilən oğlundan soruşur: "Böyük ağ kostyumlu adamlar burada nə edir?"

Komanda üzvlərindən biri Aya uçuşa hazırlaşdıqlarını ona deyir. Qoca isə Aya ismarıc göndərib göndərə bilməyəcəyini soruşur. NASA əməkdaşları yaxşı reklam olduğunu düşünərək razılaşırlar. Onlar qoca çobana maqnitofon verirlər və o da öz növbəsində navaxo dilində qısa cümlələr deyir. Sonradan NASA nümayəndələri digər navaxo hindularına bu səs yazısını dinlətirlər və tərcüməsini istəyirlər. Amma onlar bunu ingilis dilinə tərcümə etməkdən boyun qaçırırlar. Sonradan NASA nümayəndələri məşhur professor linqvistə müraciət edirlər. Alim hindu dilləri üzrə mütəxəssis idi. O, səs yazısını dinləyir və gülərək tərcümə edir: "Salam Ay qardaşları! Bu insanlara və onların  hər iki gözünə diqqət yetirin. Onlar sizin torpağı işğal etməyə gəliblər!"