Aviabiletlər ucuzlaşır - VİDEO

Aviabiletlərin qiymətləri ucuzlaşır.

Ekspertlər deyirlər ki, ötən illərlə müqayisədə azərbaycanlıların ən çox səyahət etdikləri istiqamətlərdə bilet qiymətlərində ciddi ucuzlaşma var.

Bəzi istiqamətlər üzrə hətta 50 %-ə qədər ucuzlaşma müşahidə olunur.

Qiymətlərin enməsinin əsas səbəblərindən biri reyslərin artırılması və mütəmadi olmasıdır.

Ekspert Rəhman Quliyev deyir ki, əgər pandemiyadan öncə Bakıdan İstanbulun bir hava limanına 7-8 reys həyata keçirilirdisə, indi bu say 12-yə qədər artıb. Ucuzlaşma daha çox Türkiyə və Gürcüstan istiqamətlərində müşahidə edilir.

Reyslərin artması qiymətlərin enməsi ilə yanaşı, turist mübadiləsini də sürətləndirib. Rəhman Quliyevin sözlərinə görə, AZAL-ın bu qiymət siyasətinə digər şirkətlər də özlərini uyğunlaşdırırlar.

Ekspertin sözlərinə görə, ucuzlaşma kampaniya xarakterli deyil və uzun müddətdir davam edir.

Qeyd edilir ki, aviaşirkətlərin satış siyasətinə əsasən biletlər siniflərə bölünür və satıldıqca üst kateqoriyalarda bahalaşma müşahidə edilə bilər.

Artıq uçuşlar pandemiyadan əvvəlki səviyyəyə qalxmış hesab edilir.

Ekspertin fikrincə, buna görə də, xüsusilə yay aylarında aviabilet qiymətlərində ciddi bahalaşmanın müşahidə edilməsi ehtimalı aşağıdır.