Avtobusda dilənçi oğlan qız üstündə sərnişini vurdu

Bakıda sərnişin avtobusunda dilənçi oğlan qız üstündə dava saldı. Anspress-iun məlumatına görə, hadisə axşam saatlarında 18 saylı sərnişin avtobusunda baş verib. Belə ki, Şəhidlər Xiyabanı yaxınlığında avtobusa yaşı təxminən 17-18 olan bir oğlan minib. Həmin gənc sərnişin avtobusunda dilənməyə başlayıb. Bu zaman avtobusda oturan iki gənc qız oğlana pul verib. Oğlan isə qızlara minnətdarlıq edib. Daha sonra qızlarla oğlan söhbətə başlayıblar. Bu zaman arxada oturan yaşı təxminən 23 olan bir kişi onlara sataşmağa başlayıb. O, qızları dilənçiyə maraq salmaqda günahlandırıb və onları ələ salıb. Dilənçi oğlan isə öz növbəsində qəfil həmin insana hücum edib. Oğlan özündən 5 yaş böyük olan kişiyə bir sillə vurub. Zərbənin təsirindən və dilənçi oğlanın qəfil hərəkətindən şoka düşən sərnişin heç bir qarşılıq vermədi. Növbəti dayanacaqda dilənçi oğlan və qızlar avtobusdan düşüblər. Qızlara sataşan sərnişin isə dilənçi oğlanın zərbəsinin təsiri altında yerindən tərpənməyib.