“Azərbaycan Respublikasının Nazirlər Kabineti avtomobillərin arxa yan qapılarına plyonkaların çəkilməsi ilə bağlı qərarı gecikdirir. Vətəndaşlar da bu müddət ərzində avtomobillərinin arxa qapılarının üzərinə 100%-lik qara plyonka vurdurublar. Əldə etdiyimiz məlumata görə, 100%-lik plyonkaya icazə verilməyəcək”. Avtosfer.az xəbər verir ki, bu sözləri Sia-ya açıqlamasında yol hərəkəti qaydaları üzrə ekspert Elməddin Muradlı deyib.

Onun sözlərinə görə, aidiyyatı qurumlardan Nazirlər Kabinetinə bu cür təkliflər gəlib ki, 100%-lik plyonkalardan istifadə olunmasın: “Amma bir ildən artıq bir müddətdir ki, vətəndaşlar bu 100%-lik plyonkalardan istifadə edirlər və bunun heç bir problemi yoxdur. Plyonkaların hansı qayda pozuntusunu aşkarlamağa çətinlik yaratdığını başa düşmürəm. Bunun beynəlxalq səviyyədə əsası yoxdur. Dünyanın hər yerində bu cür 100%-lik plyonkalardan istifadə edirlər və heç bir zərəri yoxdur. Bu məsələnin üzərindən 5 ay keçib. Nazirlər Kabineti bir vərəqlik kağızı 5 aydır niyə yubadır? Niyə hazırlayıb ortaya çıxarda bilmir? Əsas məsələ də bax budur. Sürücülər də bunun əziyyətini çəkir. 50-100 manat verib plyonka çəkdiriblər”.