Bakıda ilk dəfə FIFA U-15 Dünya Çempionatı və Festivalı keçirilir - FOTO

Tarixdə ilk dəfə təşkil olunan FIFA U-15 Dünya Çempionatı və Festivalına Bakı ev sahibliyi edir.

Avtosfer.az xəbər verir ki, bu mötəbər yarışın Azərbaycanda keçirilməsi Prezident İlham Əliyevin rəhbərliyi ilə həyata keçirilən dövlət idman siyasətinin, bu sahədə aparılan ardıcıl islahatların, müasir idman infrastrukturunun yaradılması və beynəlxalq əməkdaşlığın genişləndirilməsi istiqamətində görülən işlərin nəticəsi kimi qiymətləndirilir.

Turnirdə dünyanın 189 ölkəsindən FIFA-ya üzv assosiasiyaları təmsil edən 4 minə yaxın gənc futbolçu, məşqçi və rəsmi iştirak edir.

Azərbaycanın müasir idman infrastrukturu, sabitliyi, təhlükəsizliyi və beynəlxalq idman tədbirlərinin təşkili sahəsində qazandığı təcrübə belə irimiqyaslı yarışların ölkəmizdə yüksək səviyyədə keçirilməsinə imkan yaradır.

Turnir Azərbaycanın beynəlxalq futbol ictimaiyyəti ilə əməkdaşlığının genişləndirilməsi, uşaq və yeniyetmə futbolunun inkişafı, eləcə də gənclər arasında idmana marağın artırılması baxımından xüsusi əhəmiyyət daşıyır.

Qeyd edək ki, yarışın açılış oyunu və final qarşılaşması Bakı Kristal Zalında təşkil olunacaq.