Bakıda mikromobillik sifarişləri 4,5 milyonu ötdü - FOTO

Bakı şəhərində mikromobillik infrastrukturu qurulmağa başlayandan bu günə kimi bu nəqliyyat növləri 4 milyon 500 min dəfədən çox sifariş olunub.

Avtosfer.az bu barədə Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyinə (AYNA) istinadən xəbər verir.

Məlumata görə, bu müddətdə mikromobillik vasitələri ilə 13 milyon kilometr məsafə qət edilib. Bu rəqəm yalnız kirayə xidmətindən istifadə edənlərə aiddir və nəzərə alsaq ki, şəxsi velosiped və skuterlərindən istifadə edənlər də var, demək, rəqəmlər daha yüksəkdir.

Həmçinin paytaxtda skuterlər üçün 700, velosipedlər üçün isə 564 parklanma məntəqəsi təşkil edilib.

Xatırladaq ki, konseptual plana əsasən görülən işlər çərçivəsində şəhər ərazisində 50 kilometr mikromobillik şəbəkəsi təşkil edilib. Paytaxtın küçə və prospektlərdə salınan mikromobillik zolaqları bir-biri ilə əlaqələndirilir. Məqsəd kəsintisiz və davamlı zolağın təşkilidir.

Qeyd edək ki, əhali arasında velosipeddən və skuterlərdən istifadəyə artan marağı, eləcə də bu nəqliyyat növünün geniş istifadəsinin mikromobillik, nəqliyyat sıxlığının azaldılması, ətraf mühitin qorunması, fiziki fəallığın artırılması və sağlam həyat tərzi baxımından əhəmiyyətini nəzərə alaraq, sakinlər üçün şəhər konsepsiyası çərçivəsində mikromobillik zolaqları şəbəkəsinin genişləndirilməsi davam etdiriləcək.