BŞİH-in layihəsinə Binəqədi rayonu da qoşulur: 140 texnika gətirildi

Bakı Şəhər İcra Hakimiyyətinin beş ildir ki, həyata keçirdiyi bərk məişət tullantılarının yığılması, daşınması və çeşidlənməsi layihəsi uğurla davam etdirilir. Artıq paytaxtın Nərimanov, Nizami, Nəsimi, Yasamal, Xətai, Pirallahı, Suraxanı və Səbail rayonlarında icra olunan layihəyə avqustun 20-dən Binəqədi rayonunun da qoşulması qərara alınıb.

Avtosfer.az xəbər verir ki, qeyd edilməlidir ki, son vaxtlarda Binəqədi rayonunda abadlıq və təmizliklə bağlı həyata keçirilən müsbət işlər, pozitiv dəyişikliklər müşahidə edilir və bu baxımdan, layihənin Binəqədi rayonunda icrası problemlərin aradan qaldırılması istiqamətində atılan daha bir addımdır.

Layihəyə yeni qoşulacaq Binəqədi rayonunda hazırlıq işləri çərçivəsində ilk növbədə 656 konteyner meydançası yaradılıb. İlkin mərhələdə meydançalara 1 655-i yaşıl və 563-ü narıncı rəngdə olmaqla, ümumilikdə 2 218 müasir tipli yeni konteyner yerləşdirilir, əraziyə cavabdeh şəxslər təyin olunurlar.

Sakinlərin maarifləndirilməsinə xüsusi diqqət ayrılan bu layihə çərçivəsində Bakı Şəhər və Binəqədi Rayon İcra Hakimiyyətlərinin rəhbər işçiləri, bələdiyyə və təsərrüfat xidmətlərinin işçiləri və gənclərin iştirakı ilə rayonun qəsəbələrində, məhəllə və həyətlərində görüşlər keçirilir. Bakı Şəhər İcra Hakimiyyəti və "Regional inkişaf" İctimai Birliyi arasında imzalanmış Əməkdaşlıq Memorandumuna əsasən, İctimai Birliyin könüllüləri maarifləndirmə işlərinə yaxından dəstək verirlər.

Maarifləndirmə tədbirləri çərçivəsində vətəndaşlara layihənin məqsədi izah edilir, mənzillərə yaşıl və narıncı rəngli paketlər, məlumatlandırıcı bukletlər paylanılır, məhəllələrdə və binaların bloklarında posterlər yapışdırılır.

Xatırladaq ki, layihənin həyata keçirilməsi üçün dövlət büdcəsindən ayrılmış vəsait hesabına Bakı şəhər kommunal təsərrüfatı xidmətləri üçün müasir tələblərə tam cavab verən 104 ədəd yeni avtonəqliyyat vasitəsi və mexanizmləri alınaraq istifadəyə verilib və bu yaxınlarda daha 40 maşın gətiriləcək.

Bu layihənin uğurla icrası son illərdə kommunal sahədə həyata keçirilən tədbirlər nəticəsində abad şəhərə çevrilən paytaxtımızın daha təmiz saxlanılmasına, ətraf mühitin və əhalinin sağlamlığının qorunmasına, ekoloji mədəniyyətin formalaşmasına və iqtisadi səmərənin əldə olunmasına xidmət edir.