Fransanın Hərbi Dəniz Qüvvələri Qvineya körfəzində saxladığı gəmidə 6 ton kokain aşkarlayaraq müsadirə edib.

Report-un məlumatına görə, bu barədə Cənubi Afrikanın “SABC” radiostansiyası Fransa komandanlığına istinadən xəbər verib.

Əməliyyat Fransa və Niderland kəşfiyyatının əldə etdiyi məlumatlar əsasında 21 mart tarixində baş tutub. Fransanın “ Dixmude” desant gəmisi Sent-Kids və Nevis bayrağı altında hərəkət edən Nijlan yük gəmisini dayandırıb.

Gəmidə 6 ton narkotik vasitə olan kokain aşkarlanıb. Əməliyyat Sent-Kids və Nevis hökumətinin razılığı ilə həyata keçirilib.