Litva şirkətləri Bakı Limanı ilə maraqlanır

Litvanın aparıcı şirkətlərinin nümayəndələri tərəfdaşlıq imkanlarını araşdırmaq üçün Bakı Limanına səfər edib.

Bu barədə “Bakı Beynəlxalq Dəniz Ticarət Limanı” QSC məlumat yayıb.

Məlumata görə, nümayəndə heyətinə kənd təsərrüfatı, qida və yüngül sənaye sahələrində fəaliyyət göstərən şirkətlərin rəsmiləri daxildir. Bakı Limanının Əsas yük terminalının rəisi Kamran Cəlili qonaqları dəniz və quru nəqliyyat növlərini birləşdirən liman terminallarının təkmilləşdirilmiş mexanizmləri, habelə limanın cari və gələcək yükaşırma imkanları ilə tanış edib.

Nümayəndə heyətinin rəsmisi – Litva prezidentinin müşaviri Vaidas Augustianavicius Bakı Limanının dayanıqlı inkişaf təşəbbüsləri, ətraf mühitin qorunması və regionda dairəvi iqtisadiyyatın yaradılmasına töhfə vermək üzrə məqsədlərinin əhəmiyyətli olduğunu bildirib.

Xatırladaq ki, bu gün Bakıda İqtisadiyyat Nazirliyinin və nazirlik yanında Azərbaycanda İxracın və İnvestisiyaların Təşviqi Fondunun (AZPROMO) birgə təşkilatçılığı Azərbaycan-Litva biznes forumu çərçivəsində keçiriləcək. Tədbirdə Litvanın 20-dən çox şirkəti təmsil olunacaq.