Metroda aylıq sərnişindaşıma artıb

Bu ilin iyun ayında “Bakı Metropoliteni” QSC-dən 18 milyon 105 min 185, o cümlədən 518 min 603 güzəştli sərnişin istifadə edib.

Avtosfer.az səhmdar cəmiyyətinə istinadən xəbər verir ki, orta statistik hesabla gün ərzində metropolitenə daxil olan sərnişin sayı 603 min 506 olub.

Milli bayramlar və istirahət günləri də daxil olmaqla ay ərzində 13 qeyri-iş günü olub. Bayram və istirahət günlərində 6 milyon 2 min 884, qalan 17 iş günündə isə 12 milyon 102 min 301 sərnişinə daşıma xidməti göstərilib. Orta statistik hesabla metropoliten hər iş günündə 711 min 900, hər qeyri-iş günündə 461 min 760 sərnişin daşıyıb. Ən çox sərnişin daşınan gün iyun ayının 14-ü olub (737 min 749). Ayın 16-da isə ən az sərnişin daşınıb (365 min 897).

Postpandemiya dövründə ilk dəfə tarixi nailiyyət qeydə alınıb. Metropoliten tarixində ən rekord sayda sərnişin daşınmış 2019-cu ilin bir aylıq göstəricisindən daha çox sərnişin daşınıb. Cari ilin iyun ayında 2019-cu ilin həmin dövrünə nəzərən, 0,3 % çox sərnişin bu nəqliyyat növünün xidmətindən istifadə edib. İlin 6-cı ayının daşıma göstəriciləri əvvəlki illərin eyni ayları ilə müqayisədə də kifayət qədər çoxdur: 2022-ci ildən 2,3% və 2023-cü ildən 15% çox.