Orta Dəhliz vasitəsilə konteyner yüklərinin daşınması 2 dəfə artıb

Bu ilin yanvar-may aylarında Qazaxıstanın Aktau dəniz limanı Transxəzər Beynəlxalq Nəqliyyat Marşrutu (TBNM, Orta Dəhliz) üzrə daşınmaq üçün 14,3 min TEU-dan çox konteyner emal edib. “Report” bu barədə limanın daxil olduğu “Kazakstan temir jolı” dəmir yolu operatorunun məlumatına istinadən xəbər verir.

“İlk 5 ayda Aktau limanı TBNM vasitəsilə 14,3 min TEU-dan çox daşıma həyata keçirib ki, bu da 2023-cü ilin eyni dövrü ilə müqayisədə 2 dəfə çoxdur”, - məlumatda qeyd edilib.

Liman vasitəsilə 5 ay ərzində konteynerlərin ümumi daşınması 15,8 min TEU-dan çox olub ki, bu da ötən ilin analoji dövrünün göstəricisindən 50 % çoxdur. May ayı daxil olmaqla, liman 5,1 min TEU-dan çox yük daşıyıb.

Xatırladaq ki, Transxəzər Beynəlxalq Nəqliyyat Marşrutu Çin, Qazaxıstan, Xəzər dənizi, Azərbaycan, Gürcüstan ərazisindən keçərək Türkiyə və Avropa ölkələrinə uzanan beynəlxalq nəqliyyat dəhlizidir.