Rusiyadakı azərbaycanlıların məhkəməsi başlayır

Yekaterinburqun Kirovski Rayon Məhkəməsində Azərbaycan diasporu üzvlərinə qarşı cinayət işi üzrə münsiflər heyətinin seçimi başlayıb. 

Avtosfer.az xəbər verir ki, bu barədə Rusiya KİV yazıb. 

Müttəhimlər kürsüsündə Şücayəddin Rəcəbov və beş Səfərov qardaşı — Akif, Ayaz, Bəkir, Kamal və Məzahir var. Onlardan son üçü 2001-ci ildə Yunis Paşayevi qətlə yetirməkdə ittiham olunurlar. Müstəntiqlərin sözlərinə görə, Səfərovlar Paşayevin bıçaqla öldürmək istədiyi qardaşları Akifə hücumun qisasını almaq üçün "qan düşmənçiliyi"ndən istifadə ediblər.

Bundan əlavə, Ayaz Səfərov, Şücayəddin Rəcəbov və Azərbaycan diasporunun keçmiş rəhbəri Şahin Şıxlinski 2010-cu ildə Fehruz Şirinovun qətlinə cəhdin təşkilində ittiham olunurlar.

Akif Səfərovu təmsil edən vəkil Maksim Şestopalovun sözlərinə görə, təqsirləndirilən şəxslərdən heç biri günahını etiraf etmir.

Onun sözlərinə görə, bütün cinayət işi zərərçəkmiş Şirinovun sözlərinə əsaslanır və guya o, Şahin Şıxlinskinin Səfərovlara Paşayevi öldürmək üçün təlimat verdiyini eşidib.

Səfərov qardaşları 27 iyun 2025-ci ildə saxlanılıblar. Hüseyn və Ziyəddin Səfərovlar Rusiya xüsusi xidmət orqanlarının vəhşicəsinə davranışı nəticəsində vəfat ediblər. Onlar Azərbaycanda dəfn olunublar. 

İyul ayında Şahin Şıxlinski oğlu Mütvala Şıxlinski ilə birlikdə saxlanılıb. Şıxlinskilər "Mercedes Benz" markalı avtomobillə gedərkən xüsusi təyinatlı qüvvələr onlara hücum edib. Bu hadisəyə görə Şıxlinskinin oğluna Cinayət Məcəlləsinin 318-ci maddəsinin 2-ci hissəsi, "Dövlət nümayəndəsinə qarşı zorakılıq tətbiq etmə" ilə ittiham irəli sürülüb.

İki həftə sonra Şahin Şıxlinski də həbs edildi. Qeyd etmək lazımdır ki, xüsusi təyinatlı qüvvələr zabitinə hücumla bağlı Mütvala və Şahin Şıxlinskilərə qarşı qaldırılan cinayət işi ayrıca icraata götürülüb. 

Məhkəmədə münsiflər heyətinin seçilməsi prosesinə yanvarın 15-də başlanılması gözlənilir./unikal