Rusiyalıların olduğu gəminin ekipajı Finlandiyada saxlanıldı

Finlandiyada “Fitbur” adlı gəminin dənizçiləri sualtı kabelin zədələnməsində şübhəli bilinərək saxlanılıb. Gəmidə Rusiya vətəndaşlarının da olduğu bildirilir.

Avtosfer.az xəbər verir ki, istintaqın gedişi barədə Finlandiya polisi məlumat yayıb.

Məlumata görə, gəmidə istintaq hərəkətləri aparılıb. Mərkəzi Kriminal Polisin baş müstəntiqi Risto Lohi bildirib ki, dənizçilər istintaqla əməkdaşlığa hazırdırlar. Eyni zamanda gömrük orqanları tərəfindən yoxlama aparılıb və daşınan yüklər sanksiya rejiminin pozulması ehtimalı ilə müsadirə edilib.

İki nəfər barəsində həbs qətimkan tədbiri seçilib, daha iki nəfərin isə ölkədən çıxışına qadağa qoyulub.

Finlandiya hakimiyyəti artıq Rusiya səfirliyini yük gəmisinin saxlanılması ilə bağlı məlumatlandırıb. Bildirilib ki, ekipaj üzvləri arasında Rusiya vətəndaşları da var. Diplomatik nümayəndəlik vəziyyəti izləyir və zərurət yaranacağı təqdirdə konsulluq yardımı göstərməyə hazırdır.

Finlandiya hüquq-mühafizə orqanları Rusiyadan İsrailə doğru hərəkət edən yük gəmisini Finlandiya körfəzində sualtı telekommunikasiya kabellərinin zədələnməsi şübhəsi ilə saxlayıb. Gəmidə ümumilikdə 14 ekipaj üzvü olub — onların arasında Rusiya, Gürcüstan, Qazaxıstan və Azərbaycan vətəndaşları var.