Siyəzən sakininin üzərindən və evindən narkotik aşkarlandı

DİN-in Baş Narkotiklərlə Mübarizə İdarəsinin və Siyəzən Rayon Polis Şöbəsinin
əməkdaşları tərəfindən narkotik vasitələrin qanunsuz dövriyyəsinə qarşı əməliyyat
keçirilib.
Daxili İşlər Nazirliyinin Mətbuat Xidmətinin Quba regional qrupundan verilən
məlumata görə, keçirilən əməliyyat-axtarış tədbirləri nəticəsində narkotik
vasitələrin qanunsuz dövriyyəsində şübhəli bilinən rayon sakini Nicat Əhədov
saxlanılıb. Həmin şəxsin üzərinə baxış keçirilən zaman narkotik vasitə olan
marixuana aşkar edilərək götürülüb.
Davam etdirilən əməliyyat-axtarış tədbirləri zamanı N.Əhədovun evindən narkotik
tərkibli çətənə (kannabis) bitkiləri aşkar olunaraq maddi sübut kimi götürülüb.
Faktla bağlı istintaq aparılır.