Şuşada ilk yaşayış kompleksinin tikintisinə hazırlıq gedir - VİDEO

"Şuşada birinci yaşayış kompleksinin tikintisi üzərində işlər aparılır".

Avtosfer.az-ın məlumatına görə, bunu Azərbaycan Prezidentinin Şuşa rayonunda xüsusi nümayəndəsi Aydın Kərimov Şuşa şəhərində "Münaqişədən sonrakı humanitar gündəliyin inkişafı: mədəni mühitin canlandırılması yolu ilə davamlı inkişaf" mövzusunda keçirilən beynəlxalq konfransın açılışında deyib. Aydın Kərimov bildirib ki, Şuşada quruculuq- bərpa işləri sürətlə davam edir. Abidələrin çoxu artıq bərpa edilib. Bütün işlər əsas plana uyğun olaraq aparılır. Aydın Kərimov vurğulayıb ki, artıq orta məktəb və xəstəxananın inşasına başlanıb. Jurnalistlərə açıqlama verən mədəniyyət naziri Anar Kərimov isə bildirib ki, işğaldan azad olunmuş ərazilərdə 404 abidə və 1000-ə yaxın mədəniyyət müəsissəsi aşkarlanıb. Nazir qeyd edib ki, abidələrdə bərpa- quruculuq işlərinin aparılması ilə bağlı iştirakçılarla müzakirələr aparılacaq. Tədbirdə iştirak edən Türk Dövlətləri Təşkilatının Baş katibi Bağdad Amreyev bildirib ki, rəhbərlik etdiyi qurum işğaldan azad edilmiş ərazilərin bərpası prosesinə öz töhfəsini verməyə hazırdır. İCESCO-nun baş direktoru Səlim bin Məhəmməd əl-Malik isə çıxışı zamanı postmünaqişə dövründəki inkişafa diqqət çəkib.Qeyd edək ki, Şuşada "Münaqişədən sonrakı humanitar gündəliyin inkişafı: mədəni mühitin canlandırılması yolu ilə davamlı inkişaf" mövzusunda beynəlxalq konfrans mayın 20-də işini davam etdirəcək.