“Volkswagen” servisdə sürücülərin başına Şok hadisələr gətirilir

Bəzən avtoservis əməkdaşları ilə sürücülər arasında mübahisə və fikir ayrılıqlarına rast gəlinir. Bunun əsas səbəbi isə təbbi ki, avtomobillərin keyfiyyətli təmir olunmaması, yaxud da çox baha qiymətə sürücüyə təhvil verilməsidir. İslaminSesi bildirir ki,  bu cür mübahisələr yaransa da, sonda hər iki tərəf ortaq məxrəcə gələrək sülhlə ayrılır. Lakin redaksiyamıza daxil olan şikayət məktubu ilə tanış olduqdan sonra bu problemin hələ çox mübahisələrə yol açacağını yəqin etdik. Belə ki, şikayət məktubunda şəxs özünün “Volkswagen Tiguan” markalı avtomobilini Volkswagen Servis mərkəzinə apararaq baxışdan keçirdiyini qeyd edir. Baxış zamanı maşında yağın təzyiqinin aşağı olması üzə çıxır. Servis əməkdaşları sürücüyə nasazlığın aradan qaldırılması üçün bir neçə gün lazım olduğunu bildirirlər.  Bir gün sonra servis mərkəzinə baş çəkən sürücü burada rastlaşdığı mənzərədən sözün əsl mənasında şok keçirir. Belə ki, sürücüyə  cəmi 90 min km/saat məsafə qət edən avtomobilin motor hissəsinin tamamilə sökülərək çıxarıldığı, həmçinin təmir üçün 7 min manatın tələb olunduğu deyilir. Avtomobil sahibi ondan icazəsiz bu cür hərəkətin edilməsinə etiraz və iradını bildirdikdə isə kobud rəftarla üzləşir. Ona avtomobilinin motor hissəsini özünün yığmasını deyirlər və servisi tərk etməsini istəyirlər. Sürücü isə şikayət məktubunda bu cür hadisələrin  bir çox Wolkswagen sahibinin başına gətirildiyini yazır. Belə özbaşınalıqlara son qoyulması üçün bir çox şikayətçinin şirkəti Bakıda məhkəməyə vermək istədiyini qeyd edir. Həmçinin  Almaniyada yerləşən baş ofisə şikayət yazmaq haqda düşündüklərini də vurğulayır.  

Qeyd edək ki, yazıda adı çəkilən şirkətin və  servis mərkəzinin mövqeyini də dərc etməyə hazırıq.