Xəstə uşağın əməliyyatına yığılan 10 min manatı ələ keçirdi - MƏHKƏMƏ

Azərbaycanda xəstə uşağın əməliyyatına yardım adı ilə dələduzluq edən şəxsin əməlləri ifşa edilib.

Oxu.Az-ın istintaq materiallarından əldə etdiyi məlumata əsasən, hadisə uşaq serebral ifilicindən əziyyət çəkən Gülsüm Dadaşovanın anası və əmisi “Azad Azərbaycan” televiziyasının (ATV) “Həyat gözəldir” (aparıcısı Hacı Nuran olub) verilişinə müraciət etdikdən sonra başlayıb.

Verilişdən sonra balaca Gülsümün əmisinin mobil telefon nömrəsinə zəng vurulur. Zəng edən adam özünü adının bilinməsini istəməyən xeyirxah insan kimi təqdim edir.

O, Gülsüm Dadaşovanın Türkiyə Respublikasında əməliyyat edilməsi üçün 50 000 manat pul lazım olduğunu, bunun üçün özünün 40 000 manat yardım edəcəyini vəd edir.

Yerdə qalan 10 000 manat pulun Gülsümün ailəsi tərəfindən verildiyi təqdirdə əməliyyatın icra ediləcəyini söz verir.

Gülsümün ailəsi uşağın sağalması üçün əlindən gələni edir və “xeyirxah insan”ın dediklərinə inanır.

Bundan sonra o, müxtəlif adlar altında əməliyyatın tezləşdirilməsi üçün Gülsümün ailəsindən köçürmə yolu ilə pul alır.

Bir müddətdən sonra isə xəstə uşağın ailəsi nəticənin olmadığını gördükdə polisə şikayət edir.

İstintaq müəyyən edir ki, Gülsümün əməliyyatı üçün yalan vədlər verən şəxs 10 000 manat məbləğində dələduzluq əməli törədib. 

Təqsirləndirilən şəxs ona elan edilmiş ittihamda özünü təqsirli bilib.

O, ifadəsində deyib ki, “Həyat gözəldir” verilişinə baxarkən xəstə uşağın anasının müsahibə verdiyini görüb.

“Həmin xanım qızına yardım etmək üçün imkanlı şəxslərdən kömək istəyirdi. Bu zaman düşündüm ki, imkanlı şəxslər ona yardım edəcək və o da həmin pulu götürüb öz maddi xərclərinə ödəmiş olacaq”, - deyə, təqsirləndirilən şəxs ifadəsində göstərib.

Məhkəmənin hökmü ilə təqsirləndirilən şəxs Cinayət Məcəlləsinin 178.2.4-cü maddəsi ( xeyli miqdarda ziyan vurmaqla dələduzluq) ilə təqsirli bilinərək 3 il 9 ay müddətinə azadlıqdan məhrum edilib.