Yük və sərnişin daşımada azalma qeydə alınıb

2021-ci ilin yanvar-avqust ayları ərzində Azərbaycanda yük və sərnişin daşımaları ötən ilin müvafiq dövrü ilə müqayisədə azalıb.

Dövlət Statistika Komitəsinin məlumatına görə, yük daşımaları 1,4 faiz və sərnişindaşımaları isə 11,8 faiz azalıb. 

Nəqliyyatçılar 744,5 milyon sərnişinə xidmət göstəriblər. Sərnişinlərin 95,8 faizi avtomobil nəqliyyatı, 3,9 faizi metro, qalan hissəsi isə digər nəqliyyat növləri ilə daşınıb.

Nəqliyyat sektorunda fəaliyyət göstərən təsərrüfat subyektləri tərəfindən 124,4 milyon ton yük daşınıb.

Yüklərin 3,0 faizi dəniz, 7,8 faizi dəmir yolu, 0,3 faizi hava, 57,0 faizi avtomobil nəqliyyatı, 31,9 faizi isə boru kəməri ilə daşınıb.

Qeyri-dövlət sektoruna məxsus nəqliyyat vasitələri ilə daşınmış yüklərin həcmi 2,4 faiz azalıb, daşınmış yüklərin ümumi həcmində bu sektorun xüsusi çəkisi 77,8 faiz təşkil edib.