Vətəndaşlar COVID-19 pandemiyasından dərs götürməyib - HƏKİM

Payız mövsümünün gəlişi ilə əlaqədar soyuqdəymə və qripəbənzər xəstəliklər artıb. İmmunitetin zəifləməsi, hava şəraitinə uyğun geyinməmək və xəstə şəxslərin kollektiv mühitlərdə ehtiyatsız davranması virusların sürətlə yayılmasına səbəb olur. Mövsüm dəyişikliyi xüsusilə həssas qruplar üçün risklər yaradır. 

Mövzu ilə bağlı Həkim Adil Qeybulla Avtosfer.az-a açıqlamasında bildirib ki, bu, spesifik bir hal değil:

“Həmişə baş verən, gördüyümüz mənzərədir. Payız fəsli gələndə insanlar xəstələnməyə başlayırlar. Çoxsu geyim formasını düz seçmir, kondisionerə öyrəşir, bir müddət ondan əl çəkə bilmir. Soyuqdəymə baş verir, immun sistemi zəifləyir, viruslar fəallaşır. Ondan sonra isə orqanizmdə qripəbənzər əlamətlər, yuxarı tənəffüs yollarının iltihabı baş verir. Burada təkçə qrip deyil, müxtəlif mənşəli viruslar, hansı ki havadamcı yolu ilə keçir, fəallaşır və qripəbənzər bir mənzərə yaranır və həmin şəxs yoluxur. Bəla burdadır ki, həmin şəxs kollektivə gəlir və başqalarını yoluxdurur. Biz COVID-19 pandemiyasından dərs götürmədik, insanlar bir-birini qorumalıdırlar. Ona görə də xəstə olan zaman maskadan istifadə etmək lazımdır. Qapalı yerdə, avtobusda, müxtəlif tədbirlərdə, qapalı mühitdə maskadan istifadə zəruridir. Əks halda asqırdıqda, öskürdükdə bütün o mikroblar ətraf mühitə dağılır və tənəffüs yollarına düşür və başqalarını xəstələndirir. Bir xəstə adam başqa bir insanın həyatına son qoya bilər. Ağır xəstəlikləri olan bir zəif adam yoluxa bilər və ondan dünyasını dəyişə bilər. Yer kürəsində qripdən hər il 1 milyona yaxın insan dünyasını dəyişir. Ona görə də mən hesab eləyirəm ki, biraz bu məsələyə ciddi yanaşılmalıdır”.

Züleyxa