«Azəryolservis» yol çəkir, vətəndaşlar dağıdır - FOTOLAR

Yol təsərrüfatına ziyan təkcə yol nəqliyyat hadisələri zamanı dəymir. Avtosfer.az "Azəryolservis"ə istinadən təqdim etdiyi fotolarda avtomobilyuma məntəqəsinə və tikinti materialları satılan mağazalara giriş-çıxışı daha da asanlaşdırmaq və genişləndirmək üçün obyekt sahibləri səki daşlarını bax belə dağıdırlar.

«Azəryolservis» ASC-nin mətbuat xidmətinin rəhbəri Anar Nəcəfli Avtosfer.az-a bildirib ki, bəzi vətəndaşlar öz şəxsi mənafelərini hər şeydən üstün tuturlar: «Bu zaman yol təsərrüfatına dəyən maddi ziyanı bir kənara qoyaq. Bu cür insanlar və bəziləri hər şeyə “mənim deyil” fikri ilə yanaşırlar. Əsas problemi də məhz “mənim deyil, nə olursa olsun” fikrindədir. Fotolarda avtomobil yuma məntəqəsinə və tikinti materialları satılan mağazalara giriş-çıxışı daha da "asanlaşdırmaq" və ya genişləndirmək üçün obyekt sahibləri səki daşlarını bax belə dağıdırlar. Burada əsas məqam odur ki, onlara yol verilib, ancaq daha da geniş yol istəyirlər ki, daha rahat olsun. Tikinti materialları mağazaları olan cərgədə bir-neçə yerdən giriş-çıxış verilib. Ancaq bunlar hərəsi öz mağazasının qabağından yol istəyiblər ki, maşınları ilə rahat girib-çıxsınlar. Bir 10-15 metr yol qət etmək istəmirlər».

Qeyd edək ki, fotolarda əks olunan avtoyuma məntəqəsi təzə təmir olunmuş Əhməd Cəmil küçəsindədir. Tikinti materialları olan yer isə «Baksol yolu»nun Ziya Bünyadova çıxan hissəsidir.

Elmin