Maşını 210-la sürən sürücü saxlanıldı - VİDEO – FOTO

Yolda 210 km/saat sürətlə hərəkət edən sürücü saxlanıldı. Avtosfer.az xəbər verir ki, sürücü Fərzun Həsənov idarə etdiyi 99-OV-419 qeydiyyat nişanlı “Kia Rio” markalı avtomobillə magistral yolda 210 km/saat sürətlə hərəkət edərək özünü videoya çəkib və çəkdiyi videonu Facebook sosial şəbəkəsində paylaşıb.

Baş Dövlət Yol Polisi İdarəsindən Avtosfer.az-a verilən məlumata görə sürücü Fərzun Həsənov etdiyi əmələ görə idarəyə dəvət olunub. O, izahatında bildirib ki, sürətlər panelinin şüşəsi olmadığı üçün sürət göstəricisini 210 km/saat sürətin üzərinə qoyub. Dostlar arasında zarafatlaşmaq üçün bu hərəkəti edən sürücü bir də belə etməyəcəyinə söz verib.

Avtomobilin sürətlər panelində olan nasazlığa görə polis əməkdaşları onu İnzibati Xətalar Məcəlləsinin 342.5-ci maddəsi ilə 50 manat məbləğində cərimə edib.

Qeyd edək ki, sürücünün 700 manata yaxın ödənilməyən cərimələri də olub. Həmin cərimələr dəbbə pulu ilə birlikdə ödətdirilib.

Fərid