Özünü yol polisinə oxşadan şəxslər 6800 manat cərimələndi - VİDEO

Türkiyənin Eskişehir şəhərində iki nəfər park edilmiş avtomobili səyyar radar kimi təqdim etdiklərinə görə yüksək məbləğdə cərimələnib.

Avtosfer.az xəbər verir ki, hadisə şəhərin dairəvi yolunda baş verib. Park etdikləri nəqliyyat vasitəsinə sayrışan işıq quraşdıraraq polisin sürət həddi yoxlaması aparması görüntüsü yaratmağa çalışıblar. Onlar bu yolla sürücülərə psixoloji təsir göstərmək və rəsmi qurum əməkdaşları təəssüratı formalaşdırmaq istəyiblər.

Hadisə sakinlər tərəfindən mobil telefonla lentə alınaraq sosial şəbəkələrdə paylaşılıb. Görüntülərin qısa zamanda yayılmasından sonra Eskişehir Polis İdarəsi tərəfindən araşdırma aparılıb və avtomobildə olan şəxslərin kimliyi müəyyən edilib.

Məlumata görə, “qanunvericiliklə icazə verilməyən nəqliyyat vasitələrinə sayrışan və ya səs siqnalları olan qurğuların quraşdırılması və istifadəsi” maddəsi ilə 173 min 392 türk lirəsi (6 min 755 manat) məbləğində cərimə ediliblər. Bundan əlavə, nəqliyyat vasitəsi müsadirə olunub və faktla bağlı istintaq hərəkətlərinə başlanılıb.

Qeyd edək ki, Türkiyə qanunvericiliyinə əsasən, xüsusi təyinatlı nəqliyyat vasitələrinə məxsus işıq və səs siqnallarının qanunsuz istifadəsi ciddi inzibati məsuliyyət yaradır.

Eltac Zülfüqaroğlu