Polisdən qaçan sürücü şəhər kamerası ilə tapılıb həbs edildi

Sürücülük hüququ olmadan avtomobil idarə edən və polisin qanuni tələbinə məhəl qoymayan sürücü həbs edilib. 

Avtosfer.az xəbər verir ki, noyabrın 25-i paytaxtın Tbilisi prospektində hərəkət edən 99-PJ-339 qeydiyyat nişanlı "Lada Vesta" markalı avtomobilin sürücüsünə yol polisləri tərəfindən saxlama işarəsi verilib. Lakin sürücü verilən göstərişə məhəl qoymayaraq polisdən qaçmağa nail olub. 
Dövlət Yol Polisi əməkdaşları tərəfindən təhlükəsiz şəhər kamerası vasitəsilə aparılan axtarış nəticəsində məlum olub ki, həmin sürücü Nəsimi rayonu Asif Məhərrəmov küçəsindədir. Sürücü orada dayandırılaraq törətdiyi xətalar, o cümlədən avtomobilin üzərində ödənilməyən 1360 manatın olduğu ona bildirilir. Lakin sürücü müxtəlif bəhanələr gətirərək avtomobili polis əməkdaşlarına verməkdən imtina edib və onların qanuni tələblərinə əməl etməyib. 
Sürücü tabesizlik göstərdiyi üçün Çevik Polis Alayı əməkdaşlarının vasitəsilə Nəsimi rayon 19-cu Polis Bölməsinə təhvil verilib.

Bakı Şəhər Dövlət Yol Polisi İdarəsinin bölmə rəisi polis polkovniki Vaqif Əsədov Avtosfer.az-a bildirib ki, 19-cu polis bölməsində sürücü Əmirli Samir Aqil oğlu barəsində tərtib edilmiş protokol və toplanılmış materiallar Nəsimi Rayon Məhkəməsinə göndərilib. Noyabrın 26-ı tarixində keçirilən məhəkəmədə Əmirli Samir Aqil oğlu barəsində 20 gün müddətinə inzibati həbs qərarı verilib.

Təbriz