Sürücülər bu yolu dairə bilib səhvə yol verir – DİQQƏT! - VİDEO

Paytaxtın Yasamal rayonunda sürücüləri çaşdıran bir ərazi var ki, burada bir çox hallarda qəzaların baş verməsinin şahidi oluruq. Belə ki, Hüseyn Cavid prospektində, “Space” radiosunun yaxınlığında, əvvəlki “Əzizbəyov heykəli”nin yanındakı yol dairəyə bənzəsə də, əslində dairə hesab edilmir. Bunun əsas səbəbi həmin hissədə dairə nişanının olmamasıdır.

Avtosfer.az xəbər verir ki, bu barədə qəza əleyhinə kursların məşqçisi Aqil Rəhimov məlumat verib.

Onun sözlərinə görə, sürücülər bu hissəyə yaxınlaşarkən çox vaxt buranı dairə kimi qəbul edir və buna uyğun hərəkət edirlər. Halbuki dairə işarəsi olmadığından, burada dairənin ümumi qaydaları keçərli deyil.

Aqil Rəhimov bildirir ki, təhlükəsizliyi qorumaq üçün həmin əraziyə daxil olarkən sağ zolaqda hərəkət etmək daha məqsədəuyğundur. Bu, xüsusilə soldan gələn və yolu dairə kimi zənn edən sürücülərlə qarşıdurma ehtimalını azaldır:

“Bəzi sürücülər elə bilirlər ki, onlar dairədədirlər və üstünlüyə malikdirlər. Halbuki bu ərazi dairə deyil. Ona görə də sağ zolağı seçmək həm özünüzü, həm də digər hərəkət iştirakçılarını qorumaya kömək edir,” – deyə Rəhimov vurğulayıb.

Məşqçi əlavə edib ki, qeyd edilən nöqtədə nişanlanmanın olmaması hərəkət iştirakçıları üçün çaşqınlıq yaradır və bu səbəbdən sürücülər daha ehtiyatlı olmalı, vəziyyəti düzgün qiymətləndirməlidirlər.

Eltac Zülfüqaroğlu