Tuneldə "şahmat oynayan" sürücülər - Polis və kamera olmayanda belə edirlər - VİDEO

Xatırlayırsınızsa 10 il əvvələdək Bakıda belə bir ənənə vardı: yolda tıxac yaranan kimi sürücülər davamlı olaraq xətti tapdalamaqla əks yola çıxırdılar. Nəticədə yolun hər 2 tərəfindən yalnız polis müdaxiləsi ilə açıla bilən tıxaclar yaranırdı.

Nə isə ki, kameralar artdıqdan sonra bu praktikaya son qoyuldu. Lakin...
Avtosfer.az xəbər verir ki, kamera və polis nəzarəti olmayan yerdə ənənə davam edir. Babək prospektini Yusif Səfərov küçəsi ilə birləşdirən tuneldə bu hal hər səhər yaşanır. Tunel boyu ötməni qadağan edən davamlı xətt olsa da, sürücülər bir neçə saniyə qabağa düşmək üçün xəttə məhəl qoymurlar. Təxminən 150 metrlik yolda bəzi sürücülər 3 dəfə xətt dəyişir. Mahiyyət etibarı ilə kimsə 2-3 maşın qabağa düşsə də ümumi vəziyyət dəyişmir. 
İş burasındadır ki, həmin ərazidə polis nəzarəti də mümkün deyil. Yol polisinin orada xidmət aparması həm fiziki, həm də sağlamlıq baxımından risklidir. Lakin çarə var: tuneldə kamera yerləşdirməklə problemin öhdəsindən asanlıqla gəlmək olar.