Tunelə saniyələr qalmış riskli manevr: Avtomobili sıxışdırıb önə keçdi - VİDEO

Paytaxtın Ziya Bünyadov prospektində qayda pozan sürücü avtomobilin videoregistratoruna düşüb.

Avtosfer.az-ın məlumatına görə, hadisə iyulun 14-də saat 10:03 radələrində qeydə alınıb. Belə ki, 77-VK-903 dövlət qeydiyyat nişanlı “BYD” markalı avtomobilin sürücüsü tunelə yaxınlaşarkən, üç hərəkət zolağının iki zolağa birləşdiyi hissədə təhlükəli manevr edib.

Görüntülərdən məlum olur ki, sürücü soldakı zolaqla hərəkət edərək videonu qeydə alan avtomobili son anda ötüb və onun qarşısına keçib. Bu zaman digər nəqliyyat vasitəsinin hərəkətinə maneə yaranıb və qəza şəraiti formalaşıb.

Qeyd edək ki, yolun daraldığı və zolaqların birləşdiyi hissələrdə sürücülər növbəlilik prinsipinə əməl etməli, üstünlük qazanmaq məqsədilə qəfil zolaq dəyişmələrindən çəkinməlidirlər. Belə manevrlər bir neçə saniyə vaxt qazanmağa hesablansa da, kiçik bir səhv zəncirvari qəza ilə nəticələnə bilər.

Nərmin