Yol polislərini söyən sürücü həbs edildi - FOTO

Bakıda yol polislərinin ünvanına nalayiq ifadələr işlədib onların qanuni tələblərinə tabe olmayan sürücü həbs edilib. Bakı Şəhər Dövlət Yol Polisi İdarəsinin şöbə rəisi polis polkovniki Vaqif Əsədov Avtosfer.az-a bildirib ki,  99-ZS-635 qeydiyyat nişanlı "Opel" markalı avtomobilin sürücüsü paytaxtın Fətəli Xan Xoyski küçəsi ilə Ağa Nemətulla küçəsinin kəsişməsində yolayrıcının keçmə qaydasını pozub. Yol Patrul Xidməti əməkdaşları sürücünü dayandıraraq barəsində inzibati protokol tərtib edib. Sürücü bundan qəzəblənərək polislərin ünvanına nalayiq ifadələrə işlədib və daha sonra "İnzibati Xətalar Məcəlləsi"nin 535.1-ci maddəsinin tələbini pozub.

Sürücü Rzayev Həsən Rasim oğlu ərazi aidiyyəti üzrə Nərimanov rayon polis bölməsinə təhvil verilərək barəsində raport tərtib edilib.
Bu gün Nərimanov Rayon Məhkəməsinin qərarı ilə sürücü səkkiz gün müddətinə inzibati qaydada həbs edilib.

Qeyd edək ki, onun qardaşı hal hazırda cəbhədə gedən döyüşlərdə iştirak etdiyi üçün yüngülləşdirici hal kimi səkkiz gün inzibati həbs qərarı verilib.

Təbriz